თბილისი, 18 თებერვალი — Sputnik. ბულგარეთის დროშის ქვეშ მცურავმა გემმა ბათუმის საზღვაო ნავსადგურში ნავთობპროდუქტების შემცველი წყლებით შავი ზღვა დააბინძურა, ნათქვამია გარემოს დაცვისა და სოფლის მეურნეობის სამინისტროს Facebook-გვერდზე გამოქვეყნებულ განცხადებაში.
„გემის კაპიტანის მიმართ, ადმინისტრაციული სამართალდარღვევათა კოდექსის 582-ე მუხლის მე-7 ნაწილით, ერთობლივი ადმინისტრაციული სამართალდარღვევის ოქმი შედგა“, — ნათქვამია განცხადებაში.
ბათუმის საქალაქო სასამართლომ გემის კაპიტანს 65 000 ლარის ოდენობით საჯარიმო სანქცია დააკისრა, სამართალდამრღვევი ასევე ვალდებულია გარემოსთვის მიყენებული ზარალი — 1078 ლარი აანაზღაუროს.
უწყების ინფორმაციით, გემი საქართველოს ტერიტორიულ წყლებს, დაკისრებული საჯარიმო სანქციებისა და გარემოსათვის მიყენებული ზიანის თანხის გადახდის შემდეგ დატოვებს.
