თბილისი, 17 თებერვალი — Sputnik. პოლკოვნიკ ბესიკ ქუთათელაძის სახელობის საჩხერის სამთო მომზადების სკოლას დაარსებიდან 12 წელი შეუსრულდა, ნათქვამია საქართველოს თავდაცვის სამინისტროს მიერ გავრცელებულ განცხადებაში.
სკოლის პირად შემადგენლობას დაბადების დღე საქართველოს შეიარაღებული ძალების წვრთნისა და სამხედრო განათლების სარდალმა, პოლკოვნიკმა მალხაზ მაკარაძემ მიულოცა.
მაკარაძემ სამხედრო მოსამსახურეებს წარმატებები უსურვა და სამსახურისთვის მადლობა გამოუცხადა.
საიულბილეო ცერემონიას პარლამენტის წევრები დიმიტრი მხეიძე და სულხან მახათაძე დაესწრნენ. სამთო სკოლის პირად შემადგენლობას სკოლის იუბილე ქალაქ საჩხერის მერმა და საჩხერის საკრებულოს თავმჯდომარემაც მიულოცეს.
ღონისძიების დასრულების შემდეგ სამხედრო მოსამსახურეების დაჯილდოების ცერემონიალი გაიმართა. უწყებრივი მედლებით ხუთი, ხოლო სამსახურებრივი საშტატო იარაღით კი ოთხი სამხედრო მოსამსახურე დაჯილდოვდა.
საჩხერის სამთო მომზადების სკოლასთან არსბული მე-16 სამთო ბატალიონი 1991 წლის 1 ივლისს დაარსდა. მის დაარსებას საფუძველი საქართველოს ეროვნულმა გმირმა ბესიკ ქუთათელაძემ ჩაუყარა. საქართველოს თავდაცვის მინისტრის, 2014 წლის 29 მაისის N738 ბრძანების საფუძველზე, საჩხერის სამთო მომზადების სკოლას პოლკოვნიკ ბესიკ ქუთათელაძის სახელი მიენიჭა.
საჩხერის სამთო მომზადების სკოლა 2004 წელს დაარსდა. 2010 წელს ნატოს გადაწყვეტილებით ნატოს პროგრამით „პარტნიორობა მშვიდობისათვის” (Partnership for Peace) სკოლას „ნატოს განათლებისა და მომზადების ცენტრის“ სტატუსი მიენიჭა. სწავლების კურსის შემუშავებით დაკავებულია საფრანგეთის სამთო მომზადების ცენტრი.
