თბილისი, 5 იანვარი — Sputnik. შინაგან საქმეთა სამინისტროს თანამშრომლებმა თბილისში, ნარკოტიკული საშუალების უკანონო შეძენა-შენახვის და გასაღების ბრალდებით, ირანის მოქალაქე დააკავეს, ნათქვამია უწყების მიერ გავრცელებულ განცხადებაში.
გამოძიებით დადგინდა, რომ 1988 წელს დაბადებული ნარკორეალიზატორი, რომელიც ნარკოტიკულ საშუალებას სისტემატურად ყიდდა, წარსულში ნასამართლევია.
„სამართალდამცველებმა, დაკავებულის საცხოვრებელი ბინის ჩხრეკისას, ბუპრენორფინის შემცველი ნარკოტიკული საშუალების 2 აბი ამოიღეს. პოლიციამ ჰ.ქ.-ს მიერ გაყიდული, ბუპრენორფინის შემცველი ნარკოტიკული საშუალების 40 აბი ნივთმტკიცებად ამოიღო“ — ნათქვამია უწყების განცხადებაში.
ნარკოლოგიური შემოწმებისას ბრალდებულს ოპიუმის, მეტადონისა და მარიხუანის მოხმარების ფაქტი დაუდგინდა.
გამოძიება მიმდინარეობს სსკ-ის 260-ე მუხლის მე-3 და მე-5 ნაწილით, რაც გულისხმობს დიდი ოდენობით ნარკოტიკული საშუალების არაერთგზის უკანონო შეძენა-შენახვასა და გასაღებას და ითვალისწინებს 7-დან 14 წლამდე ვადით თავისუფლების აღკვეთას.