თბილისი, 4 იანვარი — Sputnik. შინაგან საქმეთა სამინისტროს თანამშრომლებმა ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვის ბრალდებით თბილისში ერთი პირი დააკავეს, ნათქვამია უწყების მიერ გავრცელებულ განცხადებაში.
გამოძიებით დადგინდა, რომ 1987 წელს დაბადებული ბრალდებული წარსულში ერთხელ უკვე იყო ნასამართლევი.
სამართალდამცველებმა დამნაშავის ბინის ჩხრეკისას ნივთმტკიცებად ამოიღეს მაკაროვის სისტემის ცეცხლსასროლი იარაღი, მჭიდი და 3 საბრძოლო ვაზნა.
გამოძიება მიმდინარეობს სსკ-ის 236-ე მუხლის მე-2 ნაწილით, („ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა, შენახვა, ტარება, დამზადება, გადაზიდვა, გადაგზავნა ან გასაღება"), რაც ითვალისწინებს ოთხი წლის ვადით თავისუფლების აღკვეთას.