თბილისი, 27 დეკემბერი — Sputnik. საქართველოს ენერგეტიკისა და წყალმომარაგების ეროვნულმა კომისიამ (სემეკი) თბილისში ელექტროგამანაწილებელი კომპანია „თელასის" აბონენტებს ტარიფი გაუზარდა, იუწყება საზოგადოებრივი მაუწყებლის პირველი არხი.
განახლებული ტარიფი 2018 წლის 1 იანვრიდან შევა ძალაში და 2020 წლის ბოლომდე იმოქმედებს. ტარიფის 1,5635 თეთრით მომატებას კომისიის ყველა წევრმა ერთხმად დაუჭირა მხარი.
დღეისთვის თბილისში სამომხმარებლო ტარიფი კომპანია „თელასის" აბონენტებისთვის, რომლებიც თვეში 101 კვტ. სთ–მდე ელექტროენერგიას მოიხმარენ, 12,980 თეთრია, ახალი წლიდან ის 14,5435 თეთრი გახდება (10,7%).
აბონენტებისთვის, ვინც 101-დან 301კვტ.სთ-მდე ელექტროენერგიას მოიხმარს, ტარიფი 16,992 თეთრიდან 18,5555 (8,4%) თეთრამდე გაიზრდება, ხოლო 301კვტ.სთ-დან ზევით მოხმარებულ ენერგიაზე — 21,476 თეთრიდან 23,0395 თეთრამდე (6,8%).
ელექტროენერგიის ტარიფი კომერციული სექტორისთვის დაახლოებით 1,56 თეთრით გაიზარდა.
ლარის კურსი 27 დეკემბერს – 2,5751 GEL/$1.
