თბილისი, 23 დეკემბერი — Sputnik. სულ 69 პირია დაკავებული საპოლიციო კონტროლისა და ოპერატიულ-საგამოძიებო ღონისძიებების შედეგად, რომლებიც 22-23 დეკემბერს მთელი საქართველოს მასშტაბით განხორციელდა, იუწყება შსს-ს პრესსამსხურის ვებგვერდი.
32 ადამიანი დაკავებულია სსკ-ით გათვალისწინებული დანაშაულის ჩადენისათვის, აქედან ცეცხლსასროლი იარაღის უკანონო შეძენა-შენახვა-ტარებისთვის 6 პირი, ნარკოტიკების უკანონო შეძენა-შენახვისთვის — 12. ასევე, წვრილმანი ხულიგნობისა და პოლიციისადმი დაუმორჩლებლობის ფაქტზე ადმინისტრაციული წესით დაკავებულია 37 პირი.
გარდა ამისა, სხვადასხვა დანაშაულისათვის 4 ძებნილი პირი დააკავეს.
ამოღებულია სხვადასხვა სახის ნარკოტიკული საშუალებები და 50 ცეცხლსასროლი იარაღი, მათ შორის ნებაყოფლობით ჩაბარებულია 16 ერთეული იარაღი. ასევე, ამოღებულია 33 ხელყუმბარა, 12 კაფსულ-დეტონატორი და 2278 ცალი ვაზნა.
საპოლიციო კონტროლი, რიგ შემთხვევებში, გულისხმობდა ზედაპირული შემოწმების განხორციელებას, ის ემსახურება საზოგადოების უსაფრთხოებისა და მართლწესრიგის დაცვას.
საპოლიციო კონტროლის დროს სულ გადამოწმდა 36 330 პირი.
