თბილისი, 22 დეკემბერი — Sputnik. საქართველოს პრემიერ-მინისტრმა გიორგი კვირიკაშვილმა სრულიად საქართველოს კათოლიკოს-პატრიარქს, ილია მეორეს აღსაყდრებიდან 40 წლისთავი მიულოცა.
ილია მეორე საქართველოს კათოლიკოს-პატრიარქად 1977 წლის 23 დეკემბერს აირჩიეს, ინტრონიზაცია 25 დეკემბერს გაიმართა.
„სულ რამდენიმე დღეში ჩვენს კათოლიკოს-პატრიარქს საქართველოში მისი პატრიარქობის, მისი მეუფების 40 წლის იუბილე უნდა მივულოცოთ. ეს არის უმნიშვნელოვანესი თარიღი, ვინაიდან ამ 40 წლის განმავლობაში საქართველოში სულიერება აღორძინდა", — განაცხადა კვირიკაშვილმა პარლამენტში სიტყვით გამოსვლისას.
მთავრობის მეთაურმა აღნიშნა, რომ ილია მეორე საყოველთაო პატივისცემით სარგებლობს არა მხოლოდ საქართველოში, არამედ მის ფარგლებსა გარეთაც, მიუხედავად რელიგიური კუთვნილებისა.
გიორგი კვირიკაშვილმა კათოლიკოს-პატრიარქს ჯანმრთელობა და ხალხის დიდხანს მსახურება უსურვა.
1980-იან წლებში, ილია მეორის პატრიარქობისას საქართველოში მართლმადიდებლობის მასშტაბური აღორძინება მოხდა. ამ წლებში საქართველოში ეპარქიების რაოდენობა 15-დან 33-მდე გაიზარდა.
1977 წელს საქართველოში 48 მოქმედი ეკლესია იყო, ამჟამად მათი რიცხვი 1000-ს აჭარბებს.
თბილისში აშენდა საქართველოს ყველაზე დიდი სალოცავი — წმინდა სამების საკათედრო ტაძარი.
