თბილისი, 20 დეკემბერი — Sputnik. შინაგან საქმეთა სამინისტროს თანამშრომლებმა ისანი-სამგორის რაიონში მდებარე „საქართველოს ბანკის" ექსპრეს ფილიალის დაყაჩაღების ბრალდებით ორი პირი დააკავეს, ნათქვამია უწყების მიერ გავრცელებულ განცხადებაში.
გამოძიებამ დაადგინა, რომ დამნაშავეები ქინძმარაულის ქუჩაზე მდებარე ბანკის მოლარე-ოპერატორს ცეცხლსასროლი იარაღის მუქარით 3900 ლარი გასტაცეს და შემთხვევის ადგილიდან მიიმალნენ.
პოლიციამ რამდენიმესაათიანი ძებნის შედეგად ბრალდებულები ცხელ კვალზე დააკავა და თანხის ნაწილი ნივთმტკიცებად ამოიღო.
გამოძიება მიმდინარეობს სსკ-ის 179-ე მუხლის მე-3 ნაწილით, რაც ყაჩაღობას გულისხმობს და ითვალისწინებს 8-დან 12 წლამდე თავისუფლების აღკვეთას.
