თბილისი, 19 დეკემბერი — Sputnik. ოთხი ჭრილობა აქვს მიყენებული 15 წლის მოზარდს, რომელიც თბილისში მოსწავლე ახალგაზრდობის სასახლის სკვერში დაჭრეს, განუცხადა ჟურნალისტებს მაღალი სამედიცინო ტექნოლოგიების ცენტრის ერთ-ერთმა ექიმმა (ინგოროყვას სახელობის საუნივერსიტეტო კლინიკა).
მოზარდი სამშაბათს დღისით, სავარაუდოდ, დანით არის დაჭრილი. დაჭრილი გადაყვანილია კლინიკაში, მას ოპერაცია უტარდება.
„პაციენტი მოყვანილია შემთხვევის ადგილიდან სასწრაფო დახმარების ბრიგადის მიერ. შემოყვანისას გამოხატული იყო ნაკვეთ-ნაჩხვლეტი ჭრილობა გულ-მკერდის არეში და წელის მიდამოში. აღენიშნება ტრავმული ჰემოპნევმოთორაქსი პლევრისა და პერიკარდის დაზიანებით. პაციენტი ამჟამად იმყოფება საოპერაციო ბლოკში, მიმდინარეობს ოპერაცია“, — განაცხადა ექიმმა.
რა გახდა მოზარდის დაჭრის მიზეზი, ჯერჯერობით უცნობია.
სისხლის სამართლის საქმე აღძრულია სსკ-ის 108-ე მუხლით (განზრახ მკვლელობის მცდელობა), რაც 7-დან 15 წლამდე ვადით თავისუფლების აღკვეთით ისჯება.
