თბილისი, 17 დეკემბერი — Sputnik. ბელგიის სამეფოში საქართველოს წარმომადგენლობამ საქართველოს საელჩოს სახელით ბრიუსელში საახალწლო მიღებას უმასპინძლა, ნათქვამია საგარეო საქმეთა სამინისტროს მიერ გავრცელებულ განცხადებაში.
ღონისძიებას ესწრებოდნენ ბელგიაში აკრედიტებული დიპლომატიური კორპუსის, ევროკავშირის ინსტიტუტებისა და ბიზნეს–წრეების წარმომადგენლები.
ღონისძიება საქართველოს ელჩმა ნატალი საბანაძემ გახსნა და დამსწრე საზოგადოებას დამდეგი შობა-ახალი წელი მიულოცა.
მოწვეულმა სტუმრებმა ქართული ღვინო და კერძები დააგემოვნეს.
მიღების ფარგლებში მოწვეული იყო ქართველი ჯაზ-პიანისტი და კომპოზიტორი ბექა გოჩიაშვილი. მისმა ვირტუოზულმა შესრულებამ სტუმრები აღაფრთოვანა.
ბექა გოჩიაშვილმა ნიუ–იორკში პრესტიჟული მუსიკალური სკოლა „ჯულიარდი“ დაამთავრა, სკოლაში ის, მცირე ასაკის გამო, გამონაკლისის სახით მიიღეს.
უკანასკნელ წლებში ბექა პოპულარულ ამერიკელ ჯაზ–მუსიკოს ჩიკ კორიასთან თანამშრომლობს, რომელიც Grammy–ს მრავალგზის მფლობელია.
