თბილისი, 11 დეკემბერი — Sputnik. პაატა გურასპაული საქართველოს კალათბურთის ფედერაციის ახალ პრეზიდენტად აირჩიეს.
საქართველოს კალათბურთის ფედერაციის ახალი პრეზიდენტის არჩევნებში ფედერაციის 34 დელეგატიდან მონაწილეობა 27-მა მიიღო. გურასპაულმა ხმების აბსოლუტური უმრავლესობა — 80% მიიღო.
საქართველოს კალათბურთის ფედერაციის პრეზიდენტის პოსტზე მეორე პრეტენდენტმა, შიო ხეცურიანმა საკუთარი კანდიდატურა არჩევნების დაწყებამდე მოხსნა.
„მადლობას გადავუხდი ფედერაციას გაწეული სამსახურისთვის და გაკეთებული პროექტებისთვის. საკალათბურთო სამყაროსთან ერთად ვიქნები და თქვენთან ერთავად განვახორციელებ მნიშვნელოვან პროექტებს. კალათბურთი უნდა გახდეს მასობრივი და ხელი შევუწყოთ ბავშვთა კალათბურთის განვითარებას. ამასთან, აუცილებელია ქალთა კალათბურთის აღორძინებაც“, — განაცხადა გურასპაულმა.
გურასპაული ოთხი წლის ვადით აირჩიეს, ის საქართველოს კალათბურთის ფედერაციას 2022 წლამდე უხელმძღვანელებს.
