თბილისი, 1 დეკემბერი — Sputnik. დედაქალაქის საახალწლო გაფორმებასა და განათებაზე წელს თბილისის მერია 3 მილიონ ლარს დახარჯავს, ნათქვამია თბილისის მერიის პრეს-სამსახურის მიერ გავრცელებულ განცხადებაში.
დედაქალაქის ცენტრალურ ქუჩებზე — რუსთაველის, მელიქიშვილისა და ჭავჭავაძის გამზირებზე, ასევე პეკინისა და ბარათაშვილის ქუჩებზე საახალწლო განათების დამონტაჟება გუშინ დაიწყო და რამდენიმე დღეში დასრულდება. აღნიშნულ სამუშაოებს შპს „თბილსერვის ჯგუფი″ ახორციელებს.
საახალწლო ილუმინაციების მონტაჟის გამო თბილისის ცენტრში ღამის საათებში მოძრაობაზე შეზღუდვები დაწესდა. გუშინ უკვე გადაიკეტა რუსთაველის გამზირი – ვარდების მოედნიდან თავისუფლების მოედნამდე და კოსტავას გამზირი – თბილისის საკონცერტო დარბაზიდან მეტრო „რუსთაველამდე".
შეზღუდვები ღამის 12-დან დილის 7 საათამდე მომდევნო 4 დღის განმავლობაში იმოქმედებს.
დედაქალაქში საახალწლო ილუმინაციების მონტაჟი დეკემბრის შუა რიცხვებში დასრულდება.
ხატია გიგოლაშვილი
