თბილისი, 10 ნოემბერი — Sputnik. შინაგან საქმეთა სამინისტროს თანამშრომლებმა ახალციხეში ერთ-ერთ თურქულ ბარში ჩხუბის გამო სამი ადამიანი დააკავეს, ნათქვამია უწყების მიერ გავრცელებულ განცხადებაში.
გამოძიებით დადგინდა, რომ ბრალდებულები 9 ნოემბრის ღამით ახალციხეში ერთ-ერთ თურქულ ბარში შევიდნენ, სადაც საქართველოსა და თურქეთის მოქალაქეებთან ჩხუბი დაიწყეს. ჩხუბის დროს თურქეთის ერთმა მოქალაქემ თავის არეში დაზიანება მიიღო.
შემთხვევის ადგილზე პოლიციის თანამშრომლები მივიდნენ, რომელთა არაერთგზის მოთხოვნას — დაეცვათ წესრიგი, ახალგაზრდები არ დაემორჩილნენ. მათ პოლიციის თანამშრომლებს სიტყვიერი შეურაცხყოფა მიაყენეს, რის გამოც ისინი დააკავეს.
ახალციხეში ხუთშაბათს გამართულმა სასამართლო სხდომამ ახალგაზრდებს 10-დღიანი პატიმრობის ვადა შეუფარდა. მას შემდეგ, რაც დაკავებულები დროებითი მოთავსების იზოლატორში გადაიყვანეს, ქუჩაში მათი ახლობლები და მეგობრები შეიკრიბნენ, რომლებიც აცხადებდნენ, რომ ისინი პოლიციელებმა სცემეს და საავადმყოფოში გადაყვანას მოითხოვდნენ.
ერთ-ერთი დაკავებულის ახლობელმა ტელეკომპანია Rustavi2-ს განუცხადა, რომ დაკავებულებიდან ერთ-ერთს მრავლობითი ტრავმები აქვს მიღებული.
შსს-ს მტკიცებით, ერთ-ერთი დაკავებული საავადმყოფოში გადაიყვანეს, თუმცა დეტალურმა გამოკვლევამ აჩვენა, რომ მას არანაირი დაზიანებები არ აღენიშნებოდა.
მომხდარ ფაქტზე გამოძიება „ხულიგნობის“ მუხლით მიმდინარეობს, რაც ითვალისწინებს ჯარიმას, ან საზოგადოებისთვის სასარგებლო შრომას ვადით 120-დან 180 საათამდე, ან ერთ წლამდე ვადით თავისუფლების აღკვეთას.
