თბილისი, 9 ნოემბერი — Sputnik. თბილისის საქალაქო სასამართლომ ტრანსგენდერი ქალის ცემაში ბრალდებული დამნაშავედ ცნო და სასჯელის სახედ და ზომად განუსაზღვრა თავისუფლების აღკვეთა 6 თვის ვადით, ნათქვამია საქართველოს მთავარი პროკურატურის ვებგვერდზე გამოქვეყნებულ განცხადებაში.
გამოძიებამ დაადგინა, რომ ბრალდებული ტრანსგენდერს გენდერული იდენტობის მიმართ გამოვლენილი შეუწყნარებლობის მოტივით გაუსწორდა. ტრანსგენდერმა სხეულის მსუბუქი დაზიანება მიიღო.
„სასამართლომ სრულად გაიზიარა ბრალდების მხარის მიერ წარდგენილი მტკიცებულებები და ტრანსგენდერი ქალის ცემაში ბრალდებული ა.გ. დამნაშავედ ცნო საქართველოს სისხლის სამართლის კოდექსის 126-ე მუხლის პირველი ნაწილით", — ნათქვამია განცხადებაში.
სასამართლოს გადაწყვეტილების გამოცხადების შემდეგ ბრალდებული სასამართლო სხდომის დარბაზიდან აიყვანეს.
თბილისის საქალაქო სასამართლოს განცხადებაში აღნიშნულია, რომ ბრალდებულმა აღიარა ჩადენილი დანაშაული.
„სისხლის სამართლის საქმის მასალებიდან გამომდინარე, ბრალდებულსა და დაზარალებულს შორის კონფლიქტი, დაზარალებულის ლგბტ თემისადმი კუთვნილების გამო წარმოიშვა. სასამართლომ მიიჩნია, ურთიერთშელაპარაკების ნიადაგზე, საზოგადოებრივი თავშეყრის ადგილას, ბრალდებულის მხრიდან ტრანსგენდერი ქალის ცემა, მიზნად ისახავდა დაზარალებულის მიმართ აშკარა უპატივცემულობის გამოხატვას", — ნათქვამია სასამართლოს ვებგვერდზე გამოქვეყნებულ განცხადებაში.
