თბილისი, 9 ნოემბერი — Sputnik. საქართველოს პარლამენტის თავმჯდომარე თვლის, რომ საქართველოში შრომითი უფლებების დასაცავად ბევრი რამ არის გასაკეთებელი.
„განსაკუთრებული პრიორიტეტია შრომის უსაფრთხოების სტანდარტების გაუმჯობესება და ამ კუთხით ძალიან ბევრი რამ გაკეთდება. შესაბამისი ინიციატივები არის უკვე შეტანილი საქართველოს პარლამენტში და შესაბამისი კანონპროექტები იქნება მიღებული საკანონმდებლო ორგანოს მიერ უახლოეს მომავალში", — განუცხადა საქართველოს პარლამენტის თავმჯდომარემ ჟურნალისტებს კონფერენციის „შრომითი უსაფრთხოება — ცვლილებების დღის წესრიგი“ მისასალმებელი სიტყვით გახსნის შემდეგ.
კონფერენციაზე შრომითი უფლებების, შრომის უსაფრთხოების და ამ მიმართულებით არსებული საერთაშორისო გამოცდილების, ეკონომიკაში ქალთა როლის გაძლიერების, თანაბარი ანაზღაურების, მშობლის უფლებებისა და სამუშაო ადგილებზე ქალთა დისკრიმინაციის აღმოფხვრის საკითხებზე მსჯელობენ, იტყობინება საქართველოს პარლამენტის პრეს-სამსახური.
ღონისძიებაში საქართველოს საკანონმდებლო და აღმასრულებელი ხელისუფლების წარმომადგენლები, საქართველოში აკრედიტებული დიპლომატიური კორპუსის, საერთაშორისო და არასამთავრობო ორგანიზაციების, სახალხო დამცველის აპარატის, დასაქმებულთა და დამსაქმებელთა გაერთიანებების წარმომადგენლები და დარგის ექსპერტები მონაწილეობენ.
კონფერენციას საქართველოს პარლამენტი მასპინძლობს და ის შრომის საერთაშორისო ორგანიზაციის მხარდაჭერით იმართება.
