თბილისი. 8 ნოემბერი — Sputnik. ზუგდიდის ახალ საკრებულოს გაზაფხულამდე ერთით ნაკლები დეპუტატით მოუწევს მუშაობა. ამის შესახებ Sputnik საქართველოს ზუგდიდის 67-ე საოლქო საარჩევნო კომისიის თავმჯდომარემ მირანდა მესხმა უთხრა.
მას შემდეგ, რაც 2 ნოემბერს ზუგდიდის ახლადარჩეული საკრებულოს მაჟორიტარი დეპუტატი თამაზ ჟორჟოლიანი ავტოსაგზაო შემთხვევის შედეგად დაიღუპა, წამოიჭრა საკრებულოში მისი ადგილმონაცვლის არჩევის საკითხი.
„დამატებით არჩევნები 2018 წლის გაზაფხულზე იგეგმება, თუ რამე არ შეიცვალა საარჩევნო კოდექსში, მანამდე კი საკრებულო 49 მანდატიანი წარმომადგენლობით იმუშავებს“, — თქვა მირანდა მესხმა.
მისივე განცხადებით, შუალედური არჩევნები ცაიშის მაჟორიტარი დეპუტატის ადგილმონაცვლის გამოსავლენად, სავარაუდოდ 2018 წლის მაისში გაიმართება.
თინათინ ბუკია
