თბილისი, 6 ნოემბერი — Sputnik. საქართველოს საზოგადოებრივი მაუწყებლის პირველი არხის ინფორმაცია ერთდროულად შვიდ ენაზეა ხელმისაწვდომი, განაცხადა საინფორმაციო სამსახურის ხელმძღვანელმა გიორგი გვიმრაძემ.
„საიტის ქართულ ვერსიაზე გამოქვეყნებული ახალი ამბები ამიერიდან ხელმისაწვდომია სომხურ, რუსულ, აზერბაიჯანულ, ინგლისურ, აფხაზურ და ოსურ ენებზე“, განუცხადა გვიმრაძემ Sputnik-სომხეთის კორეპონდენტს.
პირველი არხის ვებგვერდმა აღნიშნული გადაწყვეტილება ქვეყანაში მცხოვრები ყველა ერის საინფორმაციო ნაკადში ჩართვის მიზნით მიიღო. ამასთან, ქვეყანაში ჯერჯერობით კვლავ აქტუალურ პრობლემად რჩება სახელმწიფო ენის, ქართულის არცოდნა ეთნიკურ უმცირესობათა შორის.
„ჩვენი საზოგადოების თითოეული წევრი უნდა იყოს ინფორმირებული იმ მოვლენებზე, რომლებიც ქვეყანაში ხდება და არ უნდა ამოვარდეს [ინფორმაციული] ნაკადიდან“, — დაამატა გვიმრაძემ.
საზოგადოებრივი მაუწყებელი არ აპირებს, გაჩერდეს ამაზე. ამ დროისათვის სახალხო დამცველის აპარატთან არსებულ ეროვნულ უმცირესობათა საბჭოსთან ერთობლივი მუშაობა მიმდინარეობს არაქართულენოვანი სეგმენტისთვის პირველი არხის საინფორმაციო მაუწყებლობის სტრატეგიის შესამუშავებლად. გამორიცხული არ არის, პირველი არხის ვებგვერდს საქართველოში მცხოვრები თემების ცხოვრებისა და საქმიანობის ამსახველი საინფორმაციო ბლოკი დაემატოს.
