თბილისი, 4 ნოემბერი — Sputnik. სოფლის მეურნეობის სამინისტროს შპს „საქართველოს მელიორაცია“ ქვემო ალაზნის სარწყავი სისტემის მაგისტრალური არხის სარეაბილიტაციო პროექტს ახორციელებს, ნათქვამია უწყების ვებგვერდზე გამოქვეყნებულ განცხადებაში.
არხში წყლის საპროექტო ხარჯის გატარების უზრუნველსაყოფად, 56 კილომეტრიანი მონაკვეთი დანალექისგან იწმინდება.
უწყებაში აცხადებენ, რომ აღნიშნული სარეაბილიტაციო სამუშაოების დასრულების შემდეგ, სიღნაღისა და დედოფლისწყაროს მუნიციპალიტეტებში სარწყავი წყლის მიწოდება 3000 ჰექტარ სასოფლო-სამეურნეო მიწის ფართობზე გაუმჯობესდება.
2012 წლიდან დღემდე კახეთის რეგიონში განხორციელდა სამელიორაციო ინფრასტრუქტურის 46 სარეაბილიტაციო პროექტი. შედეგად, წყალუზრუნველყოფილი სასოფლო-სამეურნეო მიწის ფართობი 15 409 ჰექტრამდე, ხოლო დრენირებული 3924 ჰექტრამდეა გაზრდილი.
დღეისათვის შპს „საქართველოს მელიორაცია“ ქვეყნის მასშტაბით 49 სარეაბილიტაციო პროექტს ახორციელებს.
