თბილისი, 2 ნოემბერი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა საქართველოს საბაჟო საზღვარზე განსაკუთრებით დიდი ოდენობით საქონლის გადაადგილებასთან დაკავშირებული წესის დარღვევის, ასევე განსაკუთრებით დიდი ოდენობით ფსიქოტროპული ნივთიერების უკანონო შენახვა–გადაზიდვის ფაქტზე აზერბაიჯანის მოქალაქე დააკავეს, იუწყება ფინანსთა სამინისტროს საგამოძიებო სამსახურის პრეს-სამსახური.
„გამოძიებით დადგინდა, რომ ბრალდებული მსუბუქი ავტომანქანით საქართველოს საბაჟო საზღვარზე საბაჟო-გამშვები პუნქტი „წითელი ხიდის“ გავლით ცდილობდა აზერბაიჯანის რესპუბლიკაში მალულად გადაეტანა განსაკუთრებით დიდი ოდენობით, საერთო ჯამში 62 000 ლარის საბაჟო ღირებულების სხვადასხვა დასახელების მედიკამენტი“, — ნათქვამია უწყების მიერ გავრცელებულ განცხადებაში.
სამძებრო ღონისძიებების შედეგად ასევე ამოღებულია 716 ფირფიტა ფსიქოტროპული ნივთიერების — 3 000 გრამი „პრეგაბალინის“ შემცველი მედიკამენტი („ლირიკა“).
საქმეზე მიმდინარეობს გამოძიება საქართველოს სისხლის სამართლის კოდექსის 214-ე მუხლის მეორე ნაწილით, 261-ე მუხლის მეოთხე ნაწილით და 263-ე მუხლის მესამე ნაწილით.