თბილისი, 1 ნოემბერი — Sputnik. იტალიელმა სამართალდამცველებმა ყალბი დოკუმენტების ფლობის ბრალდებით საქართველოს მოქალაქე დააკავეს, იუწყება საზოგადოებრივი მაუწყებლის პირველი არხი.
როგორც იტალიური მასმედია წერს, საფრანგეთის საზღვართან მდებარე ქალაქ ვენტიმილიას პოლიციამ 38 წლის გ.ი.-ს საბუთები ტურინი-მადრიდის ავტობუსით მგზავრობისას შეუმოწმა.
მამაკაცს ლიტვური პასპორტი და მართვის მოწმობა აღმოაჩნდა. დოკუმენტების ფალსიფიცირების შესახებ ცნობილი მას შემდეგ გახდა, რაც პოლიციამ პასპორტი სპეციალური ინსტრუმენტების გამოყენებით შეამოწმა.
პიროვნების მონაცემების გადამოწმების შემდეგ აღმოჩნდა, რომ ტურინის სასამართლომ გ.ი.-ს დაკავების განკარგულება ჯერ კიდევ აგვისტოში გასცა.
მას ბრალად ქურდობა ედება. პოლიციამ მამაკაცი დააკავა და ამჟამად ის სასჯელაღსრულების დაწესებულებაშია გადაყვანილი.
