თბილისი, 28 ოქტომბერი — Sputnik. საკრებულოს ჯერ კიდევ მოქმედი თავმჯდომარე გიორგი ალიბეგაშვილი ენის სახელმწოფო დეპარტამენტის თავმჯდომარის პოსტს დაიკავებს, იუწყება „საზოგადოებრივი მაუწყებლის“ პირველი არხი.
ენის სახელმწოფო დეპარტამენტი 1990-იან წლებამდე ფუნქციონირებდა, შემდეგ კი გაუქმდა. უწყების აღორძინების შესახებ გადაწყვეტილება საქართველოს პრემიერ-მინისტრმა გიორგი კვირიკაშვილმა მიიღო.
„როგორც პრემიერის დავალებაშია მოცემული, უნდა შემუშავდეს დებულება, განისაზღვროს ყველა მიმართულება, ყველა ხაზი და ბუნებრივია, რომ ქალაქის წინაშე ვალდებული ვართ, შეძლებისდაგვარად დავიცვათ ქართული ენის სიწმინდე, აბრა იქნება ეს, თუ წარწერა“, — განაცხადა გიორგი ალიბეგაშვილმა.
მას ასევე აფხაზური ენის დაცვისა და განვითარების სახელწიფო პროგრამის შემუშავება მოუწევს.
პროფესიით ფილოლოგი გიორგი ალიბეგაშვილი 1959 წელს დაიბადა. 2014 წლის ადგილობრივი თვითმმართველობის ორგანოების არჩევნების შემდეგ თბილისის საკრებულოს თავმჯდომარის პოსტს იკავებდა. მანამდე ის საქართველოს საპატრიარქოს ანდრია პირველწოდებულის სახელობის ქართული უნივერსიტეტის ლექტორი იყო.
საკრებულოს თავმჯდომარის პოსტზე ალიბეგაშვილს, სავარაუდოდ, მისი მოადგილე გიორგი ტყემალაძე შეცვლის.
21 ოქტომბერს საქართველოს მოქალაქეებმა 64 ქალაქისა და რაიონის მერები და საკრებულოს დეპუტატები აირჩიეს.
