თბილისი, 25 ოქტომბერი — Sputnik. საქართველოს პარლამენტის თავმჯდომარე ირაკლი კობახიძემ ოფიციალური ვიზიტის ფარგლებში ისრაელის პირველ პირებთან შეხვედრები გამართა, სხვადასხვა მიმართულებით თანამშრომლობის საკითხები და უსაფრთხოების კუთხით არსებული გამოწვევები განიხილა.
საქართველოს საპარლამენტო დელეგაცია ისრაელში 24 ოქტომბერს გაემგზავრა. ვიზიტის მიზანია — ქვეყნებს შორის არსებული თანამშრომლობის გაღრმავება და განმტკიცება, ნათქვამია პარლამენტის ვებგვერდზე გამოქვეყნებულ განცხადებაში.
„ჩვენ გვაკავშირებს უფრო მეტი, ვიდრე მხოლოდ სახელმწიფოთაშორისი კარგი ურთიერთობები, ჩვენ გვაკავშირებს საუკუნოვანი ურთიერთობა ქართველ და ებრაელ ხალხს შორის. ჩვენთვის მნიშვნელოვანია ამ ურთიერთობების გაღრმავება", — განაცხადა კობახიძემ ვიზიტის შედეგების შეჯამებისას.
მისი თქმით, თანამშრომლობა გაღრმავდა ეკონომიკის, ტურიზმის, ინოვაციების განვითარების კუთხით.
კობახიძისა და ისრაელის პრეზიდენტ რეუვენ რივლინის შეხვედრაზე მხარეებმა ისაუბრეს ორ ქვეყანას შორის არსებულ ისტორიულ და მჭიდრო მეგობრობაზე და თანამშრომლობის სხვადასხვა მიმართულებით გაღრმავების პერსპექტივები განიხილეს.
საუბარი შეეხო საქართველოსა და ისრაელში არსებულ ვითარებას, ასევე, უსაფრთხოების კუთხით არსებულ გამოწვევებს. შეხვედრაზე ხაზგასმით აღინიშნა გამოწვევებთან გასამკლავებლად კოორდინირებული თანამშრომლობის მნიშვნელობა.
რივლინის თქმით, ისრაელის სახელმწიფო მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას. მისივე შეფასებით, საქართველო საიმედო პარტნიორი და მნიშვნელოვანი კონტრიბუტორი ქვეყანაა გლობალური უსაფრთხოების საკითხებში.
ვიზიტის ფარგლებში გაიმართა მოლაპარაკებები ქნესეთის თავმჯდომარესთან, იული იოელ ედელშტეინთან. შეხვედრა ბრძოლის ველზე დაცემული ჯარისკაცების ხსოვნის მემორიალის გვირგვინით შემკობის შემდეგ გაიმართა.
„ჩვენ ვამაყობთ ჩვენს ხალხებს შორის 26 საუკუნოვანი, ისტორიული კავშირით და სწორედ ეს ქმნის განსაკუთრებულ მოტივაციას ჩვენს ქვეყნებს შორის ურთიერთობის, მეგობრობისა და თანამშრომლობის გაძლიერებისთვის. არის ბევრი სფერო, სადაც თანამშრომლობის გაძლიერება შეგვიძლია და უკვე არსებობს მრავალი მიმართულება, სადაც უკვე აქტიურად ვთანამშრომლობთ", — განაცხადა კობახიძემ.
მან ხაზგასმით აღნიშნა, რომ 2017 წლის ივლისში საქართველოს პრემიერ-მინისტრ გიორგი კვირიკაშვილის ვიზიტი ისრაელში ძალიან ნაყოფიერი იყო.
„ვფიქრობ, რომ ჩვენს ქვეყნებს შორის ურთიერთობა ძლიერი და სტაბილურია. ჩვენი როლია არა იმაზე საუბარი, თუ რისი გამოსწორებაა საჭირო, არამედ საუბარი იმაზე, თუ რა შეიძლება დამატებით გავაკეთოთ, რომ ეს ურთიერთობები კიდევ უფრო უკეთესი გახდეს", — განაცხადა ედელშტეინმა.
ვიზიტის ფარგლებში კობახიძე ასევე ქნესეთის ოპოზიციის ლიდერს, ისააკ ჰერცოგს შეხვდა. მხარეებმა ორმხრივი ურთიერთობისა და საპარლამენტთაშორისო თანამშრომლობის საკითხები განიხილეს.
საქართველომ და ისრაელმა დიპლომატიური ურთიერთობები 1992 წლის 1 ივნისს დაამყარეს. ამის შემდეგ ქვეყნები ბევრ სფეროში სხვადასხვა ფორმატში აქტიურად თანამშრომლობენ. ქვეყნებს შორის სავაჭრო ბრუნვამ 2017 წლის იანვარ-ივნისში 9,2 მილიონ დოლარზე მეტი შეადგინა.
