თბილისი, 24 ოქტომბერი — Sputnik. საბერძნეთში საქართველოს პოლიციის ატაშეს დახმარებით, ქვეყნის პოლიციამ 35 ბინიდან ნივთების ქურდობის ბრალდებით საქართველოს ხუთი მოქალაქე დააკავა, ნათქვამია საქართველოს შსს-ს ვებგვერდზე გამოქვეყნებულ განცხადებაში.
გამოძიების მტკიცებით, ბრალდებულები, რომელთაგან ერთ-ერთი „კანონიერი ქურდია", მოიპოვებდნენ და ამუშავებდნენ ინფორმაციას გასაქურდი ბინების შესახებ, ქურდავდნენ მათ და მოპარული ნივთების რეალიზაციას ახდენდნენ. დადგენილია, რომ ბრალდებულებს საბერძნეთის რესპუბლიკაში სულ 35 ბინა აქვთ გაქურდული.
აღნიშნულ საქმეზე ოპერატიულ-სამძებრო ღონისძიებები ოთხი თვის განმავლობაში მიმდინარეობდა.
სამართალდამცველებმა, დაკავებულების საცხოვრებელი სახლების ჩხრეკისას, დიდი რაოდენობით ცეცხლსასროლი იარაღი და ნაქურდალი ნივთები ნივთმტკიცებად ამოიღეს.
