თბილისი, 24 ოქტომბერი — Sputnik. მსოფლიოში ცნობილი ისლანდიელი მომღერლის, კომპოზიტორისა და მსახიობის, ბიორკის თბილისურ კონცერტებზე ბილეთები 25 ქვეყნის ფანებმა შეიძინეს — საქართველოსთვის ეს რეკორდული მაჩვენებელია.
ბიორკის პირველი კონცერტი 31 ოქტომბერს თბილისის საკონცერტო დარბაზში (ფილარმონიაში) გაიმართება, ხოლო მეორე — 3 ნოემბერს ზაქარია ფალიაშვილის სახელობის თბილისის ოპერისა და ბალეტის სახელმწიფო თეატრის სცენაზე. ბიორკი საქართველოში თანამედროვე მუსიკისა და ვიზუალური ხელოვნების ფესტივალის SOU ფარგლებში გამოვა.
ბიორკის თბილისური კონცერტების ბილეთების უმეტესობა — 83,93% — საქართველოს მცხოვრებმა შეიძინეს. მეორე ადგილზე რუსეთია (6,74%), მესამეზე აზერბაიჯანი (1,39%). შემდეგ სომხეთი და გერმანია მოდის.
იკითხეთ ასევე: ბიორკი საქართველოში მოგზაურობას გეგმავს >>>
სიას აგრძელებს დიდი ბრიტანეთი, ისრაელი, უკრაინა, ყაზახეთი, არაბეთის გაერთიანებული საამიროები, ბელგია, ჰოლანდია, აშშ, ჩინეთი, საფრანგეთი, საბერძნეთი, იტალია და სამხრეთ კორეა.
როგორც აღმოჩნდა, ბიორკის შემოქმედების მიმართ გულგრილი არ ყოფილა მავრიტანიის, პოლონეთის, სერბეთის, ავსტრიის, ბელარუსის, ესპანეთისა და მადაგასკარის მოსახლეობაც კი.
შემსრულებელი დედაქალაქში მსმენელის წინაშე საქართველოს ეროვნული სიმფონიური ორკესტრის სიმებიანი ინსტრუმენტების თანხლებით წარდგება. ბიორკი შეასრულებს კომპოზიციებს ალბომიდან Vulnicura.
Vulnicura — ისლანდიელი მომღერლის მეცხრე სტუდიური ალბომია, რომელიც 2015 წლის 20 იანვარს გამოვიდა. ალბომი ეძღვნება გრძნობებსა და განცდებს, რომლებსაც ბიორკი მხატვარ მეთიუ ბარნისთან დაშორებისას გრძნობდა. ალბომის შექმნაში ასევე მონაწილეობდნენ The Haxan Cloak და Arca, რომლებიც მანანდე ისეთ შემსრულებლებთან მუშაობდნენ, როგორებიც იყვნენ FKA twigs და Kanye West. ალბომის მუსიკა სიმებიანი ინსტრუმენტების და ელექტრონიკის სინთეზს წარმოადგენს.
როგორც კონცერეტბის ორგანიზატორებმა ჟურნალისტებს განუცხადეს, ბიორკი ძალიან დაინტერესებულია საქართველოთი, მისი კულტურითა და მუსიკით. ამიტომ მომღერალი თავისი ვიზიტის ფარგლებში საქართველოს სხვადასხვა რეგიონის — კახეთის, იმერეთის, სვანეთის, გურიისა და აჭარის მონახულებას გეგმავს.
ბიორკი — ბიორკ გუდმუნდსდოტირი (Björk Guðmundsdóttir) 1965 წლის 21 ნოემბერს რეიკიავიკში დაიბადა. ხუთი წლიდან სწავლობდა ფორტეპიანოსა და ფლეიტაზე დაკვრას, ვოკალს. მისმა ხმამ ყურადღება მიიქცია და რადიოში ჩასაწერად მიიწვიეს. 1977 წელს გამოვიდა მისი სადებიუტო ალბომი, რომლის დიდ ნაწილს პოპულარული ჰიტებისა და ფოლკლორული სიმღერების ქავერ-ვერსიები შეადგენდა.
1986 წელს ჩამოყალიბდა ჯგუფი The Sugarcubes, რომელმაც მომღერალს სამშობლოს საზღვრებს გარეთ პოპულარობა მოუტანა.
1993 წელს ჯგუფი დაიშალა. ბიორკი ლონდონში გადავიდა. იქ გაიცნო პროდიუსერი ნელი ჰუპერი და მასთან თანამშრომლობით გამოუშვა სოლო ალბომი Debut. ალბომს მსოფლიო წარმატება ჰქონდა. ამის შემდეგ გამოვიდა მისი სტუდიური ალბომები Homogenic (1997), Vespertine (2001), Medulla (2004), Volta (2007), Biophilia (2011), Vulnicura (2015).
ბიორკის შემოქმედება მრავალ ჟანრსა და სტილს განეკუთვნება. მათ შორისაა ალტერნატიული როკი, ელექტრონიკა, ინდი-პოპი, ტრიპ-ჰოპი, modern classic, IDM.
ბიორკი ასევე ცნობილია, როგორც მსახიობი. 1999 წელს რეჟისორმა ლარს ფონ ტრიერმა გადაიღო მთავარ როლში ფილმში „სიბნელეში მოცეკვავე". ასევე მომღერალმა დაწერა ფილმისთვის მუსიკა. 2000 წელს კანის ფესტივალზე ფილმმა მთავარი ჯილდო „ოქროს პალმის რტო" მიიღო. ბიორკმა მიიღო პრიზი ქალის როლის საუკეთესო შესრულებისთვის.
ბიორკის შემოქმედება მრავალი ჯილდოთია აღნიშნული. მათ შორისაა BRIT Awards-ის ოთხი პრემია (1994 — ორი, 1996, 1998), MTV Europe Music Awards-ის პრემია (1995), MTV Video Music Awards-ის ოთხი ჯილდო (1996, 1998, 2000 — ორი), AIM Independent Music Awards (2011), Annie Awards (1997), Polar Music Prize (2010) და სხვა.
ჟურნალმა Time 2015 წელს ბიორკი შეიყვანა მსოფლიოს 100 ყველაზე გავლენიანი ადამიანის ნუსხაში, კატეგორიაში „კერპები".
