თბილისი, 23 ოქტომბერი — Sputnik. ფრანგი კომპოზიტორი, შემსრულებელი და მსოფლიოში ცნობილი ჯაზ-აკორდეონისტი რიშარ გალიანო თბილისში 24 ოქტომბერს გამოვა, იუწყებიან ღონისძიების ორგანიზატორები.
გალიანო ასტორ პიაცოლას მეგობარი და მოსწავლეა. იტალიური წარმომავლობის მუსიკოსი ვირტუოზულად უკრავს აკორდეონის ყველა სახეობაზე, საფრანგეთში მას „ჯაზის წმინდა ურჩხულს" უწოდებენ.
საქართველოს დედაქალაქს გალიანო უკვე მეხუთედ ესტუმრება.
გალიანო ამჯერად შოთა რუსთაველის სახელობის დრამატული თეატრის სცენაზე მსმენელის წინაშე წარდგება კონცერტით Are Nostrum. ის ორ ვირტუოზთან ერთად გამოვა — იტალიელ მესაყვირე პაოლო ფრეზუსთან და შვედ პიანისტ იან ლუნდგრენთან. მუსიკოსების ეს შემადგენლობა გამოდის, როგორც ტრიო Mare Nostrum.
გალიანო, ფრეზუ და ლუნდგრენი თბილისში გახსნიან მუსიკის საერთაშორისო ფესტივალს „თბილისი რიტმი" (Tbilisi Rhythm).
სცენაზე ტრიოსთან ერთად ასევე გამოვა პოპულარული ქართული ეთნო-ჯაზ ჯგუფი „ირიაო", რომელიც ქართველი კომპოზიტორის დავით მალაზონიას ნაწარმოებებს შეასრულებს.
საღამო 20:00 საათზე დაიწყება. ბილეთების შეძენა შესაძლებელია თეატრის სალაროებსა და ონლაინ ვებ-გვერდზე.
