თბილისი, 23 ოქტომბერი — Sputnik. თბილისის ჩასაბერ საკრავთა ფესტივალი (Tbilisi Wind Festival), რომელიც დედაქალაქში 1-4 ნოემბერს გაიმართება, ქართველ და უცხოელ მუსიკოსებს შეკრებს, იუწყებიან ღონისძიების ორგანიზატორები.
კონცერტები ჩატარდება ჯანსუღ კახიძის სახელობის მუსიკალური ცენტრის მცირე დარბაზში. ბილეთების შეძენა შესაძლებელია ცენტრის სალაროებში და ონლაინ.
ფესტივალის მთავარი სტუმარია ნორვეგიის ჩასაბერი საკრავების მუსიკალური აკადემიის ანსამბლი (Norwegian Music Academy Wind Ensemble) არნე პედერსენის ხელმძღვანელობით. ანსამბლის გამოსვლის პროგრამაშია ვოლფგანგ ამადეუს მოცარტის, რიხარდ შტრაუსის, იოზეფ ჰაიდნის, ჯორჯე ენესკუს, ანდერს კროგერისა და სხვათა ნაწარმოებები.
თბილისის ფესტივალის სტუმრები იქნებიან ასევე ცნობილი ნიდერლანდელი მუსიკოსი, მევიოლინე და დირიჟორი ლევ მარკიზი, ბელგიელი ფლეიტისტი ალდო ბერტენი, მევიოლინე ვერენა-მარია ფიტცი (გერმანია), ალტისტი მარკ საბა (აშშ), კონტრაბასისტი ჯავად ჯავადზადე (აზერბაიჯანი).
ქართველ მონაწილეთა შორის არიან ვირტუოზი ფაგოტისტი თემურ ბუხნიკაშვილი, პერკუსიონისტი მარიამ მაკარაშვილი, ჰობოისტი გიორგი გვანცელაძე, კლარნეტისტი ლევან ცხადაძე, მევიოლინე გია იაშვილი, ვიოლონჩელისტი ქეთევან როინიშვილი და სხვ.
თბილისის ჩასაბერ საკრავთა ფესტივალი 2009 წელს დაფუძნდა და მას, ქართველი მსმენელისთვის მსოფლიო კლასიკური მუსიკის შედევრების გაცნობასთან ერთად, საგანმანათლებლო დატვირთვაც აქვს. ფესტივალის მონაწილეები სპეციალურად კონსერვატორიისა და სამუსიკო სკოლების მოსწავლეებისთვის მასტერ-კლასებს ატარებენ.
