თბილისი, 16 ოქტომბერი — Sputnik. საქართველოში აშშ-ის ეროვნული დემოკრატიული ინსტიტუტის (NDI) დამკვირვებელთა საერთაშორისო დელეგაცია ჩამოვიდა ადგილობრივი თვითმმართველობის ორგანოებში არჩევნებზე დაკვირვების მიზნით, იუწყება ტელეკომპანია Imedi.
მისია საქართველოს მასშტაბით გამართავს შეხვედრებს ხელისუფლების, ცესკოს, არასამთავრობო ორგანიზაციების წარმომადგენლებთან, კანდიდატებთან და აგრეთვე პარტიების ლიდერებთან.
უშუალოდ არჩევნების დღეს NDI-ს დამკვირვებლები სხვადასხვა ოლქებში საარჩევნო უბნების გახსნის, ხმის მიცემის, უბნის დახურვისა და ხმების დათვლის პროცესს დააკვირდებიან.
NDI-ს სადამკვირვებლო მისია არჩევნების წინასწარი შეფასების ანგარიშს 22 ოქტომბერს პრესკონფერენციაზე გამოაქვეყნებს.
NDI-ს სადამკვირვებლო მისიას აშშ-ის დემოკრატიის მხარდამჭერი ეროვნული ფონდი (National Endowment for Democracy, NED) და საერთაშორისო განვითარების სააგენტო (USAID) აფინანსებს.
ადგილობრივი თვითმმართველობის ორგანოების არჩევნები საქართველოში 21 ოქტომბერს ჩატარდება.
