თბილისი, 10 ოქტომბერი — Sputnik. გერმანიაში, ქალაქ კიოლნში სასმელი და საკვები პროდუქციის საერთაშორისო გამოფენა Anuga–2017-ში ქართულმა კომპანიებმა მიიღეს მონაწილეობა, ნათქვამია საქართველოს ეკონომიკისა და მდგრადი განვითარების სამინისტროს სააგენტოს „აწარმოე საქართველოში" ვებ-გვერდზე.
ქართული ექსპორტიორი კომპანიები სააგენტოს „აწარმოე საქართველოში" მხარდაჭერითა და არასამთავრობო ორგანიზაცია USAID/REAP-ის ორგანიზებით გამოფენაში მეორედ იღებენ მონაწილეობას, რომელიც 7-11 ოქტომბრის პერიოდში ტარდება.
წელს გამოფენაზე 16 ქართული კომპანიის წარმოებული სასმელისა და საკვები პროდუქციის ორი სტენდია წარმოდგენილი.
Anuga — ევროპაში ყველაზე მსხვილი კვების მრეწველობის გამოფენაა, რომელიც ორ წელიწადში ერთხელ ტარდება. გამოფენას საშუალოდ 160 ათასი დამთვალიერებელი ჰყავს. გამოფენას სპეციალისტები კონტაქტების დამყარებისა და დარგში უახლესი ინფორმაციის მიღების მიზნით ესწრებიან. Anuga-ს პირველი გამოფენა 1924 წელს გაიმართა.
სააგენტო „აწარმოე საქართველოში" საერთაშორისო გამოფენებში ქართული კომპანიების მონაწილეობას სისტემატურად უწევს ორგანიზებას, რამდენადაც იგი ხელს უწყობს ქართული პროდუქციის პოპულარიზაციას და საექსპორტო პოტენციალის ზრდას საერთაშორისო მასშტაბით.