თბილისი, 7 ოქტომბერი — Sputnik. ზესტაფონის რაიონულმა სასამართლომ არასრულწლოვანი შვილის და მეუღლის მიმართ ჩადენილ ძალადობაში ბრალდებული დ.მ. დამნაშავედ სცნო, ნათქვანია საქართველოს პროკურატურის მიერ გავრცელებულ განცხადებაში.
2017 წლის ივნისში ნასვამ მდგომარეობაში მყოფმა პირმა, ზესტაფონში, საკუთარ სახლში არასრულწლოვან შვილს მიაყენა ფიზიკური შეურაცხყოფა. ხოლო 2017 წლის ივნისსა და ივლისში, ასევე ნასვამ მდგომარეობაში და პირობითი მსჯავრის ქვეშ მყოფმა არასრულწლოვანი შვილის თანდასწრებით სცემა ცოლს.
ბრალდებულს ბრალდება სსკ-ის 126-ე მუხლით („არასრულწლოვანის თანდასწრებით ჩადენილი ძალადობა და ოჯახის ერთი წევრის მიერ წინასწარი შეცნობით არასრულწლოვნის მიმართ ძალადობა“) წარედგინა და სასამართლოს განჩინებით აღკვეთის ღონისძიების სახით საპატიმრო გირაო — 4000 ლარის ოდენობით შეეფარდა.
„ზესტაფონის რაიონულმა სასამართლომ გაიზიარა ბრალდების მხარის მიერ წარდგენილი მტკიცებულებები და არასრულწლოვანი შვილის და მეუღლის მიმართ ჩადენილ ძალადობაში ბრალდებული დ.მ. დამნაშავედ სცნო", — ნათქვამია პროკურატურის მიერ გავრცელებულ განცხადებაში.
ზესტაფონის რაიონულმა სასამართლომ დ.მ. დამნაშავედ სცნო წარდგენილ ბრალდებებში და საბოლოოდ, სასჯელის სახედ და ზომად თავისუფლების აღკვეთა 2 წლის და 6 თვის ვადით განუსაზღვრა.
