თბილისი, 5 ოქტომბერი — Sputnik. თუშეთში ზამთრის პერიოდში შსს-ს სასაზღვრო პოლიციის ვერტმფრენი რეგულარულად იფრენს, იუწყება მთავრობის ადმინისტრაცია.
„ადგილობრივი მოსახლეობის საჭიროებების უზრუნველსაყოფად და ასევე უცხოელი ვიზიტორების ზრდის ფონზე, პრემიერ-მინისტრ გიორგი კვირიკაშვილის გადაწყვეტილებით, ზამთრის მანძილზე თუშეთში ყოველკვირეულად სასაზღვრო პოლიციის ვერტმფრენი იფრენს", — ნათქვამია მთავრობის ვებ-გვერდზე გავრცელებულ განცხადებაში.
თუშეთში მოსულმა პირველმა თოვლმა რეგიონში პრობლემები შექმნა. ფშაველი-ომალოს გზის მონაკვეთზე, რომელიც გუშინ ჩამოწოლილი ზვავის გამო დაიკეტა, ტრანსპორტის მოძრაობა ამ დროისათვის აღდგენილია. რეგიონში მობილიზებულია ყველა შესაბამისი უწყება და სამსახური. საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი გზის გაწმენდით სამუშაოებს ინტენსიურ რეჟიმში განაგრძობს.
