თბილისი, 29 სექტემბერი — Sputnik. ლიბიაში დაკავებული სამი ქართველი მეზღვაური ტრიპოლის იზოლატორში არაადამიანურ მოპყრობასა და ანტისანიტარიას უჩივის, ისინი საქართველოს ხელისუფლებას დახმარებას სთხოვენ, იუწყება ტელეკომპანია Rustavi2.
ქართველი მეზღვაურები, რომლებიც ტანზანიის დროშით მცურავ გემზე იმყოფებოდნენ, ეკიპაჟის დანარჩენ წევრებთან ერთად 30 აგვისტოს ლიბიის წყლებში დააკავეს. გემი არალეგალური ტვირთის გადაზიდვაში ეჭვის საფუძველზე დააკავეს.
დაკავებიდან თითქმის ერთი თვის შემდეგაც კი მეზღვაურებს არ ჰყავთ არც ადვოკატი და არც თარჯიმანი. დაკავებულების ნათესავები ქვეყნის ხელისუფლებას უმოქმედობაში ადანაშაულებენ და დახმარებას სთხოვენ.
"უცხოელი ადვოკატები მივიდნენ, ენა არ იცოდნენ, ინგლისურიც არ იცოდნენ, რომ გაეგებინებინათ რამე. არანაირი დახმარება არა აქვთ – საჭმელი არა აქვთ, სასმელი არა აქვთ. შვილი იძახის, ძაღლსაც არ აჭმევენ, ისეთ საჭმელს გვიგზავნიანო", — განაცხადა ერთ-ერთი მეზღვაურის დედამ ნანა ხოხბამ.
ქართველი მეზღვაურების თქმით, მათ არ შეხმიანებია საქართველოს საკონსულო ეგვიპტეში, რომელიც ლიბიასაც ფარავს. თარჯიმანს არ ესმის არც ერთი იმ ოთხი ენიდან, რომლებიც მეზღვაურებმა იციან.
გავრცელებული ინფორმაციით, ეკიპაჟის 11 წევრი, მათ შორის საქართველოს სამი მოქალაქე დროებითი დაკავების იზოლატორში არიან მოთავსებული.
