თბილისი, 27 სექტემბერი — Sputnik. საქართველოს შინაგან საქმეთა მინისტრმა გიორგი მღებრიშვილმა გააკეთა კომენტარი თბილისში საკულტო იუგოსლავიელი და სერბი კინორეჟისორის ემირ კუსტურიცას მომავალ ვიზიტთან დაკავშირებით, რომელიც ადრე ცხინვალში იყო ნამყოფი.
„ოკუპირებული ტერიტორიების შესახებ" საქართველოს კანონის შესაბამისად, აკრძალულია აფხაზეთში ან ცხინვალის რეგიონში ნებისმიერი კომერციული საქმიანობა ან იქ შესვლა, არა იმ ტერიტორიებიდან, რომლებსაც საქართველოს ცენტრალური ხელისუფლება აკონტროლებს. აღნიშნული დარღვევა ისჯება ჯარიმით, განმეორებითი დარღვევა იწვევს სისხლის სამართლის პასუხისმგებლობას თავისუფლების აღკვეთის გამოყენებით.
„ჩვენ, როგორც ყველა სხვა შემთხვევაში, ვიმოქმედებთ კანონის შესაბამისად", — აღნიშნა გიორგი მღებრიშვილმა.
როგორც მედიასაშუალებები მანამდე იტყობინებოდნენ, კუსტურიცა 2008 წლის აგვისტოს ომის შესახებ ფილმის გადაღებას გეგმავდა. 2009 წლის ოქტომბერში ის ფილმისთვის მასალის შესაგროვებლად ცხინვალში გაემგზავრა, თუმცა პროექტი არ განხორციელდა.
აფხაზეთისა და ცხინვალის რეგიონის ტერიტორიას საქართველოს ხელისუფლება ვერ აკონტროლებს. მოსკოვმა ამ ტერიტორიებიოს დამოუკიდებლობა 2008 წლის აგვისტოს ომის შემდეგ აღიარა. საპასუხოდ თბილისმა რუსეთთან დიპლომატიური ურთიერთობები გაწყვიტა და საქართველოს კანონი „ოკუპირებული ტერიტორიების შესახებ" მიიღო.
კუსტურიცა, საპატიო ლეგიონის ორდენის კავალერი, სერბეთის რესპუბლიკის მეცნიერებათა და ხელოვნებათა აკადემიის წევრი, კინოში მოღვაწეობის გარდა, ცნობილია როგორც ფოლკ-როკ ჯგუფ The No Smoking Orchestra-ს გიტარისტი. სწორედ ამ მუსიკალურ ჯგუფთან ერთად კუსტურიცა თბილისში სტუმრობას პირველად 8 დეკემბერს გეგმავს.
კონცერტის ბილეთების გაყიდვა სამშაბათს დაიწყო.
ჯგუფი The No Smoking Orchestra მთელ მსოფლიოში კონცერტებს მართავს. საქართველომდე ჯგუფი კონცერტებს გამართავს რუსეთში, ყაზახეთში, საფრანგეთში, ბელგიასა და ჩილეში.
ემირ კუსტურიცას და ჯგუფ The No Smoking Orchestra-ს კონცერტი თბილისის სპორტის სასახლის სცენაზე უნდა გაიმართოს.
