თბილისი, 26 სექტემბერი — Sputnik. ყაზბეგის მუნიციპალიტეტში მდინარე ბიდარაზე ძველი ხიდის აღდგენა და ასევე ექსპლუატაციაში არსებული ხიდის გაფართოება და რეაბილიტაცია საქართველოს ხელისუფლებას 2,5 მილიონი ლარი დაუჯდება, ნათქვამია რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ვებგვერდზე გამოქვეყნებულ განცხადებაში.
ხიდები მდებარეობს მდინარე ბიდარზე, საერთაშორისო მნიშვნელობის მცხეთა-სტეფანწმინდა-ლარსის საავტომობილო გზის 106-ე კმ-ზე.
პროექტის ფარგლებში მიმდინარეობს ძველი 1864 წელს აშენებული ქვის თაღოვანი ხიდის აღდგენა და ასევე ექსპლუატაციაში არსებული ხიდის გაფართოება და რეაბილიტაცია.
პროექტი სახელმწიფო ბიუჯეტიდან ფინანსდება. მისი ღირებულება — 2,5 მილიონი ლარია. საპროექტო-სამშენებლო სამუშაოები ივლისში დაიწყო და 2017 წლის ბოლომდე დასრულდება.
