თბილისი, 25 სექტემბერი — Sputnik. საქართველოს პრემიერ–მინისტრი გიორგი კვირიკაშვილი 27 სექტემბერს გერმანიის კანცლერს, ანგელა მერკელს შეხვდება, იუწყება საინფორმაციო სააგენტო Новости-Грузия მთავრობის ადმინისტრაციის ინფორმაციაზე დაყრდნობით.
კვირიკაშვილმა გერმანიის კანცლერს, ანგელა მერკელს გამარჯვება საპარლამენტო არჩევნების შედეგების გამოცხადებისთანავე მიულოცა.
"საქართველოს პრემიერ–მინისტრი ვიზიტით ბერლინში გაემგზავრება, სადაც 27 სექტემბერს გერმანიის კანცლერ ანგელა მერკელს შეხვდება. ეს არჩევნების შემდეგ პირველი შეხვედრა იქნება", – განაცხადა მთავრობის ადმინისტრაციის პრეს–სამსახურის თანამშრომელმა.
საპარლამენტო არჩევნები გერმანიაში 24 სექტემბერს ჩატარდა. არჩევნების ბოლო მონაცემების თანახმად, კანცლერ ანგელა მერკელისა და ჰორსტ ზეეჰოფერის პარტიების ბლოკი "გერმანიის ქრისტიან-დემოკრატიული კავშირი/ქრისტიან-სოციალური კავშირი" ბუნდესტაგში 246 სავარძელს დაიკავებს, რაც დიდი დანაკარგია ალიანსისთვის. აღსანიშნავია, რომ მანამდე მათ პარლამენტში 311 დეპუტატი ჰყავდათ.
