თბილისი, 18 სექტემბერი — Sputnik. საქართველოს გარემოს დაცვისა და ბუნებრივი რესურსების სამინისტროს გარემოსდაცვითი ზედამხედველობის დეპარტამენტის თანამშრომლებმა ნადირობის სეზონზე, რომელიც ქვეყანაში 19 აგვისტოს დაიწყო, სამართალდარღვევის 334 ფაქტი გამოავლინეს, ნათქვამია დეპარტამენტის Facebook-გვერდზე.
ნადირობის წესების დარღვევის ყველაზე მეტი ფაქტი დასავლეთ საქართველოს რეგიონებში – გურიაში, იმერეთში, რაჭა-ლეჩხუმ–ქვემო სვანეთში გამოვლინდა.
შემდეგ მოდის სამეგრელო-ზემო სვანეთის რეგიონი, სადაც წესების დარღვევის 100 ფაქტი გამოვლინდა.
რაც შეეხება აჭარას, აქ უკანონო ნადირობის 34 ფაქტი გამოვლინდა, კახეთში — 30, მცხეთა-მთიანეთსა და შიდა ქართლში — 24–24, თბილისში — 20, ქვემო ქართლსა და სამცხე-ჯავახეთში კი 11 ფაქტი.
30 შემთხვევაში სამართალდამრღვევებმა გამოიყენეს აკრძალული იარაღი და ხმოვანი სიგნალის გამომცემი ელექტრონული მოწყობილობები – ე.წ. "მანოკი", "პროჟექტორი", "ელექტროფარი". ოთხ შემთხვევაში ნადირობის ფაქტი დაცულ ტერიტორიებზე დაფიქსირდა. ამოღებულია 112 არარეგისტირებული სანადირო თოფი.
ნადირობა აკრძალულია სახელმწიფო ნაკრძალებსა და ეროვნულ პარკებში და ამ ზონებიდან 500 მეტრის რადიუსში, ასევე საქართველოს ქალაქების ადმინისტრაციულ საზღვრებში.
ნადირობისას ასევე აკრძალულია მცენარის საფარის დაწვა, გარეული ფრინველების კვერცხების შეგროვება და გაყიდვა, ცხოველთა ბუდეების, ბუნაგების მოშლა ან განადგურება, ცხოველთა მასობრივი მოპოვების მიზნით სხვადასხვა მოწყობილობების გამოყენება, ნადირობა თვითმფრინავიდან, ვერტმფრენიდან, ავტომობილიდან, მოტოციკლიდან, კატარღებიდან, ძრავიანი ნავებიდან და სხვა მოტორიანი სატრანსპორტო საშუალებებიდან, გარდა ამისა, აკრძალულია სტიქიური უბედურებების დროს დაუძლურებულ ცხოველებზე ნადირობა.
საქართველო გადამფრენი ფრინველებისთვის ერთ-ერთი მნიშვნელოვან ტერიტორიას წარმოადგენს.