თბილისი, 18 სექტემბერი — Sputnik. ახალციხის საავადმყოფოში ადგილობრივი საბავშვო ბაღის 16 აღსაზრდელია გადაყვანილი, განუცხადა Sputnik-საქართველოს ახალციხის საბავშვო ბაღების გაერთიანების დირექტორმა ნანა ბერიძემ.
„საავადმყოფოში ვიყავი და ბავშვები მოვინახულე. სტაციონარში 16 ბავშვი რჩება. ისინი საავადმყოფოში შაბათ ღამით, 12 საათის შემდეგ გადაიყვანეს. აქვთ მაღალი ტემპერატურა, პირღებინება და ჩვენი ვარაუდით, ენტეროვირუსთან გვაქვს საქმე“, — აღნიშნა ნანა ბერიძემ.
მისი თქმით, ერთ-ერთ აღსაზრდელს, რომელიც მჟამად თბილისში იმყოფება, იგივე სიმპტომები აღენიშნება, რაც მის ჯგუფელებს და ბავშვი თბილისის საავადმყოფოშია მოთავსებული.
„მინდა ვთქვა, რომ ახალციხეში იგივე კლინიკური სურათია იმ მოზრდილებსა და ჩვილ ბავშვებშიც, რომლებიც საბავშვო ბაღში არ დადიან — იგივე სიმპტომები აქვთ“, — ხაზი გაუსვა გაერთიანების დირექტორმა.
ნანა ბერიძემ ასევე აღნიშნა, რომ საბავშვო ბაღი კვების პროდუქტების ეროვნული სააგენტოსა და ჯანდაცვის სამინისტროს სპეციალისტებმა შეამოწმეს, რომლებმაც ბავშვების საკვებით მოწამვლა გამორიცხეს.
