თბილისი, 12 სექტემბერი — Sputnik. საქართველოს ხალხური და გამოყენებითი ხელოვნების სახელმწიფო მუზეუმში 13 სექტემბერს გაიხსნება გამოფენა სახელწოდებით „ანარეკლები — საქართველო, აბდულვაჰიდ ბუხორის კერამიკა".
აბდულვაჰიდ კარიმოვი, რომელიც აბდულვაჰიდ ბუხორის ფსევდონიმითაა ცნობილი, 40 წლის უზბეკი მხატვარ-კერამიკოსია. იგი წარმოშობით ცენტრალური აზიის ერთ-ერთი უძველესი ქალაქი ბუხარიდან, უზბეკეთის რესპუბლიკის საოლქო ცენტრიდანაა. ოსტატის შთაგონება – ტრადიციული უზბეკური კერამიკა, ასევე შუა საუკუნეების ისლამური კულტურა და თანამედროვე ფორმებია.
თბილისში წარმოდგენილი იქნება აბდულვაჰიდის ახალი ნამუშევრები და მისი საქართველოში ყოფნის დროს შექმნილი ნიმუშები. მან საქართველოში რამდენიმე თვე გაატარა და ამ დროის განმავლობაში ქართული ხალხური კერამიკის სტილში ახალი ექსპონატები შექმნა, აღნიშნავენ მუზეუმში.
გამოფენის სტუმრები დაათვალიერებენ კარიმოვის როგორც კერამიკულ ნამუშევრებს, ისე ფოტოკოლაჟს, ასევე ნახავენ უზბეკი კერამიკოსის შემოქმედებისადმი მიძღვნილ მოკლემეტრაჟიან დოკუმენტურ ფილმს.
გარდა ამისა, ხალხური და გამოყენებითი ხელოვნების სახელმწიფო მუზეუმის არქივიდან პირველად გამოიფინება ცნობილი ფოტოგრაფის დიმიტრი ერმაკოვის უნიკალური მასალები.
გამოფენა „ანარეკლები — საქართველო, აბდულვაჰიდ ბუხორის კერამიკა" 30 სექტემბრამდე გაგრძელდება.
