თბილისი, 9 სექტემბერი — Sputnik. სერჟანტი გიორგი წიქარიშვილი, პირველი კლასის რიგითი ირაკლი კუჭუხიძე და უფროსი ლეიტენანტი ივერი ბუაძე, რომლებიც ავღანეთში ბაგრამის ავიაბაზაზე თვითმკვლელის თავდასხმის შედეგად დაიჭრნენ, გასულ ღამეს მკურნალობის გასაგრძელებლად გერმანიაში გადაიყვანეს.
ტერორისტული აქტი ავღანეთში ოთხშაბათს მოხდა. ყველაზე მეტად დაშავდა ბუაძე, რომელსაც უკვე რამდენიმე ოპერაცია ჩაუტარდა. მისი მდგომარეობა სტაბილურად მძიმეა.
„ისინი გადაიყვანეს. სამივე დაჭრილი გერმანიაში მედიკოსების დაკვირვების ქვეშ იმყოფება. სავარაუდოდ, მძიმედ დაჭრილს კიდევ ერთი ოპერაცია ჩაუტარდება, თუმცა ეს ჯერჯერობით გადაწყვეტილი არ არის", — ციტირებს Новости-Грузия თავდაცვის სამინისტროს საზოგადოებასთან ურთიერთობის სამსახურის უფროსს ნინო თოლორდავას.
მედიის მონაცემებით, ქართველი მშვიდობისმყოფელები ამერიკულ ჰოსპიტალში იმკურნალებენ.
ნატოს სამშვიდობო მისია "მტკიცე მხარდაჭერა" (Resolute Support) ავღანეთში 2015 წლის 1 იანვრიდან ამოქმედდა. 2015 წლის დასაწყისში ქაბულში, ყანდაგარში, გერათში, მაზარი-შარიფში 12 000 სამხედრო განთავსდა. ქართული მხრიდან მისიაში 870 სამხედრო მონაწილეობს.
