თბილისი, 8 სექტემბერი — Sputnik. ყოფილი იპოდრომის ტერიტორიაზე, თამარაშვილის N13-ში გუშინ, გვიან ღამით ხმაური იყო. მოსახლეობა ვერხვის მოჭრას აპროტესტებდა, იუწყება ტელეკომპანია „რუსთავი 2" (Rustavi2).
თამარაშვილის ქუჩაზე „პარტიზანი მებაღეები" და თბილისის მერობის დამოუკიდებელი კანდიდატის ალეკო ელისაშვილის შტაბის წარმომადგნელებიც მივიდნენ. მათი ვარაუდით, ხეებს თამარაშვილზე მერიის ნებართვის გარეშე ჭრიდნენ, რადგან მოსახლეობის მისვლისთანავე ხის მჭრელებმა ადგილი დატოვეს. აღნიშნული ტერიტორია კომპანია „დომუსს" ეკუთვნის, რომლის წარმომადგენელიც ადგილზე არ მისულა.
ტერიტორია მერიის ზედამხედველობის საქალაქო სამსახურის წარმომადგენელმაც დაათვალიერა. მათი თქმით, რამდენიმე ხე განზრახ არის დაზიანებული. შემთხვევის ადგილზე ექსპერტ-კრიმინალისტები მთელი ღამის განმავლობაში საგამოძიებო მოქმედებებს ახორციელებდნენ.
ამ დრომდე უცნობია, მოიჭრა თუ არა ხე მერიის შესაბამისი სამსახურის ნებართვის საფუძველზე.
შინაგან საქმეთა სამინისტრომ თამარაშვილის ქუჩაზე ხის მოჭრის ფაქტზე გამოძიება უკვე დაიწო. საქმე ხე-ტყისა და ბუჩქნარის უკანონო გაჩეხვის მუხლით არის აღძრული.