თბილისი, 8 სექტემბერი — Sputnik. საცხოვრებელ ფართს ქვეყნის სხვადასხვა ქალაქში იძულებით გადაადგილებულ კიდევ 422 ოჯახს გადასცემენ, განაცხადა პრემიერ-მინისტრმა გიორგი კვირიკაშვილმა.
საცხოვრებელ ფართს დევნილებს გამოუყოფენ თბილისში, ქუთაისში, წყალტუბოსა და გორში.
ამგვარად, 2012 წლიდან მოყოლებული, საცხოვრებელი ფართით დაკმაყოფილდა 15,5 ათასზე მეტი ოჯახი. "რა თქმა უნდა, ეს პროცესი გაგრძელდება", — აღნიშნა კვირიკაშვილმა.
იმისთვის, რომ დაიკანონონ საცხოვრებელი ფართი ან ახალი ბინა მიიღონ, დევნილებმა საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს უნდა მიმართონ.
საქართველოში ამჟამად ცენტრალური ხელისუფლების მიერ არაკონტროლირებადი — აფხაზეთისა და ცხინვალის რეგიონიდან დაახლოებით 267 000 იძულებით გადაადგილებული პირი ცხოვრობს.
საქართველოში იძულებით გადაადგილებულთა საცხოვრებელი ფართით უზრუნველყოფის ოთხი სახეობა არსებობს — სახელმწიფო მათთვის ბინებს ყიდულობს; აშენებს მრავალბინიან სახლებს; თუ დევნილებს დაკავებული აქვთ სახელმწიფოს კუთვნილებაში არსებული ფართი, მას უკანონებს; თუ კერძო საკუთრებაში არსებულ ფართს იკავებენ, სახელმწიფო მათთვის ამ ფართს ყიდულობს და დევნილებს გადასცემს.
