თბილისი, 7 სექტემბერი — Sputnik. საქართველოს ფინანსთა სამინისტროს საგამოძიებო სამსახურმა შემოსავლების სამსახურის საბაჟო დეპარტამენტის თანამშრომლებთან ერთად საბაჟო საზღვარზე საქონლის გადაადგილებასთან დაკავშირებული წესის დარღვევის ორი ფაქტი გამოავლინა, ნათქვამია უწყების განცხადებაში.
გამოძიებით დადგინდა, რომ საბაჟო-გამშვები პუნქტი „ყაზბეგის“ გავლით, საბაჟო კონტროლისგან მალულად რუსეთის მოქალაქემ საქართველოში განსაკუთრებით დიდი ოდენობის ოქროს ნაკეთობები შემოიტანა, რომლის საბაჟო ღირებულება 29 989 ლარს შეადგენს.
სომხეთის რესპუბლიკის მოქალაქემ კი საბაჟო-გამშვები პუნქტი „სადახლოს“ გავლით საბაჟო კონტროლისგან მალულად ქვეყანაში შემოიტანა 52 351,55 ლარზე მეტი ღირებულების ოქროს საიუველირო ნაწარმი. საგამოძიებო მოქმედებების შედეგად ჯამში 771 გრამი ოქროს ნაკეთობებია ამოღებული.
საქმეზე გამოძიება საქართველოს სისხლის სამართლის კოდექსის 214-ე მუხლის მეორე ნაწილით მიმდინარეობს, რაც 5-დან 7 წლამდე ვადით თავისუფლების აღკვეთას ითვალისწინებს.
