თბილისი, 6 სექტემბერი — Sputnik. ქუთაისში სექტემბრის ბოლოს უსახლკაროებისთვის ახალი სოციალური სახლი გაიხსნება და 250-მდე უსახლკაროსთვის თავშესაფრად იქცევა, ნათქვამია ქუთაისის მერიის პრესსამსახურის განცხადებაში.
ბენეფიციარები საცხოვრისში 5 წლიანი სარგებლობის უფლებით სექტემბრის ბოლომდე შესახლდებიან. 4-სართულიანი შენობის ასაშენებლად 2,5 მილიონი ლარი დაიხარჯა.
ქუთაისის მერის მოადგილის, კონსტანტინე ქავთარაძის თქმით, სპეციალურმა კომისიამ ბენეფიციარები სხვადასხვა კრიტერიუმით შეარჩია: სარეიტინგო ქულები, ოჯახში შშმ-პირთა ან არასრულწლოვანი შვილების ყოფნა. მიღებულია გადაწყვეტილება, საცხოვრისით დაგეგმილი 48-ის ნაცვლად, 80 ოჯახი დაკმაყოფილდეს.
„კომისიამ დაასრულა მუშაობა. მოხდა პირველ ეტაპზე დაახლოებით 250 განცხადების რეგისტრაცია. სამუშაო იყო ძალიან შრომატევადი. შეფასების შედეგად შემუშავდა საბოლოო თემა. კომისიამ გადაწყვიტა რომ საცხოვრისში უპირობოდ შესახლდება 30 ადამიანი, რომლებიც მუდმივი საცხოვრებლის არმქონე პირები არიან“, — განაცხადა ქავთარაძემ და აღნიშნა, რომ ფართების დამატებით შეძენაზე ამჟამად მიმდინარეობს მოლაპარაკება მშენებელ კომპანიასთან, რათა მაქსიმალურად დაკმაყოფილდეს ყველა განმცხადებელი.
ქუთაისის მერიაში სოცილაური საცხოვრისის მშენებლობას უპრეცედენტო პროექტს უწოდებენ.
თბილისში უსახლკაროთათვის 240-კაციანი თავშესაფარი 2015 წელს გაიხსნა.
