თბილისი, 2 სექტემბერი — Sputnik. ბუდაპეშტში მიმდინარე ძიუდოს მსოფლიო ჩემპიონატზე 100 კილოგრამამდე წონით კატეგორიაში ქართველი ფალავანი ვარლამ ლიპარტელიანი ვერცხლის პრიზიორი გახდა.
დღემდე მას ამ ტურნირზე ერთხელ ვერცხლისა და 2-ჯერ ბრინჯაოს მედალი ჰქონდა აღებული.
ვარლამ ლიპარტელიანმა მეოთხედფინალში რუს კირილ დენისოვი დაამარცხა, ნახევარფინალში აზერბაიჯანელ ელჰან მამადოვს მისი პასიურობის ხარჯზე სძლია (აზერბაიჯანელს არბიტრმა მე-2 წუთზე სამი გაფრთხილება მისცა) და ფინალში გავიდა.
ქართველი ფინალში იაპონიის წარმომადგენელს, აარონ ვულფს შეხვდა და უპირატესობას ფლობდა. არბიტრმა იაპონელი პასიურობისთვის 2-ჯერ გააფრთხილა. იაპონელმა ფალავანმა "ოქროს ქულის" ხარჯზე გაიმარჯვა და მსოფლიოს ჩემპიონობა მოიპოვა.
კვირას, ძიუდოს მსოფლიო ჩემპიონატის დასკვნით დღეს მედლები გუნდურ ჩათვლაში გათამაშდება.
