თბილისი, 28 აგვისტო — Sputnik. ზუგდიდში, წმინდა ლუკას სახელობის რეფერალური საავადმყოფოს მესამე სართულის ფანჯრიდან 3 წლის ბავშვი გადმოვარდა, იუწყება ტელეკომპანია „რუსთავი-2“.
ტელეკომპანიის ინფორმაციით, სამი წლის გაბრიელ ლუკავას მდგომარეობა მძიმეა. ბავშვს მრავლობით მოტეხილობა და თავის ქალის ტრავმა აღენიშნება.
გავრცელებული ინფორმაციით, შემთხვევის დროს პალატაში ბავშვის დედა იმყოფებოდა, რომელიც ამ დროისათვის არსებული მონაცემებით, შვილს საჭმელს უმზადებდა.
3 წლის ლუკა ზუგდიდის საავადმყოფოს რეანიმაციულ განყოფილებაში იმყოფება, თუმცა მალე ქუთაისში გადაიყვანენ, ვინაიდან მას ბავშვთა რეანიმაცია ესაჭიროება. ქუთაისშივე ჩაუტარდება ქირურგიული ოპერაცია.
შემთხვევის ადგილზე სამართალდამცავები არიან მობილიზებული. მომხდარზე საქმე სისხლის სამართლის კოდექსის 124-ე მუხლით აღიძრა.
