თბილისი, 25 აგვისტო — Sputnik. საქართველოს კალათბურთის ეროვნულმა ნაკრებმა სერბეთის გუნდი დაამარცხა 68:66 და საბერძნეთში მიმდინარე "აკროპოლისის თასის" გამარჯვებული გახდა.
საბერძნეთის ნაკრებთან მატჩის მსგავსად, ქართველმა კალათბურთელებმა მატჩი არცთუ სახარბიელოდ დაიწყეს და პირველი მეოთხედი სერბეთის ნაკრებთან შეხვედრაში 20:15 ანგარიშით დათმეს.
მეორე მეოთხედში ილიას ზუროსის გუნდმა და გიორგი ცინცაძის, გიორგი შერმადინისა და თორნიკე შენგელიას წარმატებული თამაშის წყალობით, მდგომარეობა გაათანაბრეს – 36:36.
მატჩის მეორე ნახევარი პირველის ანალოგიურად წარიმართა იმ ანსხვავებით, რომ ქართველებმა მესამე მეოთხედში წააგეს ხუთი ქულა (14:19), ხოლო დასკვნით ეტაპზე შვიდქულიანი განსხვავებით მოიგეს (18:11) და საბოლოოდ გამარჯვება გაიფორმეს.
ყველაზე შედეგიანი საქართველოს ნაკრების შემადგენლობაში თორნიკე შენგელია აღმოჩნდა, მის ანგარიშზეა 21 ქულა და 14 მოხსნა.
როგორც აღმოჩნდა, სერბებზე გამარჯვებით საქართველოს ნაკრებმა ვადაზე ადრე მოიპოვა "აკროპოლისის თასი". ეს მას შემდეგ გახდა შესაძლებელი, რაც დღის მეორე მატჩში საბერძნეთმა იტალიას სძლია (73:70).
დღეს, 25 აგვისტოს ქართველი კალათბურთელები იტალიის წინააღმდეგ დასკვნით მატჩს გამართავენ. თამაში თბილისის დროით 19:45 საათზე დაიწყება.
"აკროპოლისის თასი" საერთაშორისო ტურნირია, რომელიც ევრობასკეტი-2017-ის მოსამზადებელი ეტაპია. ევროპის ჩემპიონატი აგვისტოს ბოლოს იწყება.
