თბილისი, 24 აგვისტო — Sputnik. საქართველოში აშშ-ის საელჩო რუსეთის მოქალაქეებისგან ჩვეულ რეჟიმში იღებს განაცხადებს ამერიკული ვიზის მისაღებად, იუწყება საინფორმაციო სააგენტო Новости-Грузия დიპლომატიური მისიის პრესსამსახურზე დაყრდნობით.
ოთხშაბათს აშშ-მა მთელ რუსეთში შეაჩერა არასაიმიგრაციო ვიზების გაცემის პროცედურა, რომელიც 1 სექტემბერს განახლდება, თუმცა მხოლოდ მოსკოვში მდებარე საელჩოში. ხუთშაბათს ცნობილი გახდა, რომ რუსეთის მოქალაქეებს ამერიკული ვიზის მისაღებად შეუძლიათ მიმართონ ნებისმიერ სხვა ქვეყანას, სადაც განაცხადის განხილვის ვადები ნაკლებია, ვიდრე მოსკოვში.
„საქართველოში აშშ-ის საელჩოსათვის ჩვეულ სამუშაო პროცესს წარმოადგენს განცხადებების მიღება მესამე ქვეყნების მოქალაქეებისგან, მათ შორის რუსეთის მოქალაქეებისგან", — განაცხადეს საელჩოში.
ვაშინგტონმა სიახლე იმით ახსნა, რომ რუსეთში დიპლომატიური წარმომადგენლობის თანამშრომლების რაოდენობა შემცირდა. მანამდე მოსკოვმა აშშ-ის დიპლომატიური მისია 755 თანამშრომლით შეამცირა, რის შემდეგაც ამერიკის საელჩოში 455 თანამშრომელი უნდა დარჩენილიყო, ანუ იმდენივე, რამდენიც აშშ-ში რუსულ დიპლომატიურ მისიაში მუშაობს.
ორშაბათს განახლებული მონაცემების თანახმად, მოსკოვში ე.წ. Visitor Visa-ს (B1 კატეგორიის ვიზას — ბიზნესი, B2 კატეგორიის — ტურიზმი) მოთხოვნის შემთხვევაში, ლოდინი 85 კალენდარულ დღეს შეადგენს. იმათთვის, ვინც სტუდენტურ ვიზას აფორმებს, გასაუბრების ლოდინი 36 დღეს შეადგენს. არასაიმიგრაციო ვიზების სხვა სახეობების განმცხადებლებს საშუალოდ 53 დღე ლოდინი მოუწევთ.
აშშ-ის საელჩოში Visitor Visa-ზე გასაუბრების ლოდინის პერიოდი კიევში შეადგენს 4 დღეს, თბილისში — 8 დღეს, პეკინში — 4 დღეს, ასტანაში — 23, ტაშკენტში — 43, ხოლო კაიროში — 23 დღეს.
