თბილისი, 23 აგვისტო — Sputnik. მავნე ნივთიერებების კონცენტრაცია ბორჯომის ხეობაში, სააც 20 აგვისტოდან ებრძვიან ტყის მასშტაბურ ხანძარს, დასაშვებ ნორმას არ აღემატება, ნათქვამია გარემოს ეროვნული სააგენტოს განცხადებაში.
სპეციალისტებმა ჰაერის ხარისხი იმ დასახლებულ პუნქტებში შეამოწმეს, რომლებიც ხანძრის უშუალო სიახლოვეს მდებარეობს. კერძოდ: წაღვერში, ცემში, სადგერში, დაბაში, ტბასა და ყვიბისში; ასევე დაბა ბაკურიანსა და თავად ქალაქ ბორჯომში.
„კვლევების შედეგად გაიზომა ჰაერში მყარი შეწონილი ნაწილაკები, აზოტის დიოქსიდი და ნახშირჟანგი. აღნიშნული კვლევების შედეგად ყველა კომპონენტი ზღვრულად დასაშვები ნორმების შესაბამისობაშია“, — ნათქვამია გარემოს ეროვნული სააგენტოს განცხადებაში.
უწყების ინფორმაციით, ჰაერის ხარისხის შემოწმება მიმდინარეობს სტიქიის ზონის მიმდებარე სხვა დასახლებულ პუნქტებშიც.
