თბილისი, 14 აგვისტო — Sputnik. ბორჯომში ავტოსატრანსპორტო შემთხვევის შედეგად საავადმყოფოში გადაყვანილი დაშავებულების ჯანმრთელობის მდგომარეობა მძიმეა, იუწყება ტელეკომპანია Rustavi2.
ტურისტი ქალი და კიდევ რამდენიმე ადამიანი კვადროციკლით სეირნობდნენ, რა დროსაც ის გადაბრუნდა. დაშავებულთა შორისაა 4 წლის ბავშვი, რომელიც კლინიკაში მოათავსეს.
ტელეკომპანიის ცნობით, დაღუპული ქალი და დაშავებულები არიან ტურისტები ერთ–ერთი არაბული ქვეყნიდან.
სისხლის სამართლის საქმე აღძრულია სსკ–ის 276–ე მუხლის მეხუთე ნაწილით – ტრანსპორტის მოძრაობის უსაფრთხოების ან ექსპლუატაციის წესის დარღვევა, რამაც ადამიანის სიცოცხლის მოსპობა გამოიწვია. დანაშაული ოთხიდან შვიდ წლამდე პატიმრობით ისჯება.