თბილისი, 14 აგვისტო — Sputnik. საქართველო–რუსეთის საზღვარზე საკონტროლო–გამშვებმა პუნქტმა "ყაზბეგმა" მუშაობა დროებით შეწყვიტა, მისი თანამშრომლები ევაკუირებული არიან, აღნიშნულია საქართველოს ფინანსთა სამინისტროს შემოსავლების სამსახურის ვებ–გვერდზე განთავსებულ განცხადებაში.
ევაკუაციის მიზეზი მდინარე თერგის ადიდება გახდა. წინასწარი ინფორმაციით, წყლის დონის მომატება ღვარცოფმა გამოიწვია, რომელმაც მდინარის ერთი შენაკადი ჩახერგა.
"დარიალის ხეობაში არსებული რთული მეტეოროლოგიური ვითარებიდან გამომდინარე შექმნილი საგანგებო სიტუაციის გამო, პრობლემის აღმოფხვრამდე, საბაჟო გამშვები პუნქტი "ყაზბეგი" დროებით წყვეტს მუშაობას. ფინანსთა სამინისტროს შემოსავლების სამსახურის საბაჟო გამშვებ პუნქტში "ყაზბეგი" თანამშრომლებისა და ხალხის ევაკუაცია განხორციელდა", – ნათქვამია განცხადებაში.
ამჟამად ტრანსპორტის მოძრაობა საქართველოს სამხედრო გზაზე დაკეტილია. გზის სახიფათო მონაკვეთებზე არცერთი ავტომობილი არ მოძრაობს, ხოლო გზის 134–135–ე კმ მონაკვეთზე მოძრაობა ქვეითად მოსიარულეებისთვისაც აკრძალულია.
