თბილისი, 11 აგვისტო — Sputnik. საქართველოს პრემიერმა გიორგი კვირიკაშვილმა დააჯილდოვა ის მოსწავლეები, რომლებიც 2016-2017 სასწავლო წელს წარმატებით გამოვიდნენ საერთაშორისო ოლიმპიადებზე, ნათქვამია მთავრობის პრეს-სამსახურის განცხადებაში.
ქართველმა მოსწავლეებმა საერთაშორისო არენაზე მიიღეს 14 მედალი ხუთ დისციპლინაში – მათემატიკა, ფიზიკა, ქიმია, ინფორმატიკა და ბიოლოგია.
"ზუსტ და საბუნებისმეტყველო დარგებში საქართველოს ჰყოლია მსოფლიო დონის მეცნიერები და, დარწმუნებული ვარ, ამ დარბაზში, როდესაც თქვენ გიყურებთ, ვუყურებ ჩვენი ქვეყნის მომავალს და ჩვენი ქვეყნის მეცნიერების მომავალს… იცოდეთ, რომ საქართველოს თქვენი იმედი აქვს და იცოდეთ, თქვენ ხართ ჩვენი ქვეყნის ხვალინდელი დღე", — მიმართა კვირიკაშვილმა მოსწავლეებს.
განათლება მთავრობის ერთ-ერთი მთავარი პრიორიტეტია და ხელისუფლება ამ სფეროს განვითარებისთვის პროექტების განხორციელებას განაგრძობს, აღნიშნა პრემიერმა.
ღონისძიებას ესწრებოდნენ ვიცე-პრემიერი, განათლებისა და მეცნიერების მინისტრი ალექსანდრე ჯეჯელავა, მისი მოადგილეები, პატარა გენიოსების მშობლები, პედაგოგები და სკოლის დირექტორები.
